Spanja do t’i bashkohet çështjes së gjenocidit të ngritur nga Afrika e Jugut kundër veprimeve të Izraelit në Gaza në Gjykatën Ndërkombëtare të Drejtësisë, tha të enjten ministri i saj i jashtëm José Manuel Albares.

Spanja është vendi i parë europian që i është bashkuar kësaj çështjeje, të cilës i janë bashkuar edhe Kili dhe Meksika. Të martën e kaluar Spanja njoftoi njohjen e shtetit palestinez së bashku me Irlandën dhe Norvegjinë.

Afrika e Jugut paraqiti rastin e saj në Gjykatën Ndërkombëtare të Drejtësisë në fund të vitit të kaluar, duke pretenduar se Izraeli po shkelte konventën e gjenocidit në sulmet ndaj Gazës.

Gjykata ka urdhëruar Izraelin të ndalojë menjëherë ofensivën e tij ushtarake në qytetin jugor të Gazës, Rafah.

Ndërkohë, autoritetet shëndetësore të udhëhequra nga Hamasi në Gaza pretendojnë se mbi 36,000 palestinezë janë vrarë që nga 7 tetori nga bombardimet e pamëshirshme të Izraelit ndaj Rripit të Gazës dhe ofensivës së tij tokësore.

Sulmi i Hamasit brenda Izraelit më 7 tetor vrau rreth 1,140 njerëz, rreth 250 njerëz u morën peng dhe u dërguan në Gaza./abcnews.al